Şêniyên Tebqayê li dijî dagirkeriya dewleta Tirk meşiyan

Bi sedan şêniyên gundewarê bakur rojavayê Tebqayê bi meşekê êrişên artêşa Tirk a dagirker li ser gelên Bakur û Rojhilatê Sûriyê şermezar kirin.  Di meşê de hate gotin, Tirkiyê hewl dide careke din DAIŞ`ê vejîne.

Bi sedan şêniyên bajarokên Cirniye, El-Mehmudlî û Saykol û gundên derdorê li aliyê têketina bajarokê Cirniyê kom bûn û ji bo şermezarkirina êrişên artêşa Tirk a dagirker û çeteyên wê li ser gelên Bakur û Rojhilatê Sûriyê meşiyan.

Xwepêşendaran wêneyên şehîdên herêmê, wêneyên zarokên ku di encama êrişên hovane yên artêşa Tirk a dagirker de li ser herêmê birîndar bûne, alên Hêzên Sûriye Demokratîk, Hêzên Ewlekariya Hundirîn, Rêveberiya Sivîl a Demokratîk a herêma Tebqayê, Rêveberiya Jinan û Meclisa Malbatên Şehîdan hildan.

Meş ji aliyê têketina bajarokê ber bi navenda bajarokê ve destpê kir. Şêniyan sloganên silavkirina Berxwedana Rûmetê û lehengiya Hêzên Sûriye Demokarîtk berz kirin.

Meş piştî kolanên sereke derbas kir li navenda bajêr rawestî û veguherî mitîngê. Mitîng bi deqeyek rêzgirtin destpê kir. Paşê hevserokê Meclisa Rêveber a Rêveberiya Sivîl a Tebqayê Şiyar Mihemed axivî, diyar kir ku dewleta Tirk bi rêya êrişên xwe hewl dide zêdetirî 5 milyon sivîl bi zorê çek û bombeyên qedexekirî koçber bike.

Mihemed destnîşan kir ku Tirkiyê bi siyaseta xwe hewl dide DAIŞ`ê vejîne.

Ji aliyên xwe ve hevserokê Meclisa Tebqayê Elûş El-Xidir û endama rêveber a Rêveberiya Jinan a Cirniyê axivîn, bêdengiya navdewletî şermezar kirin û gotin her êrişek li dijî gel û hêzên ku ax ji DAIŞ`ê rizgar kirine bi xwe êrişek li dijî mirovahiyê tevahî ye.

Di dawiyê de xwepêşendaran sloganên silavkirina berxwedana gelên herêmê berz kirin.

(şx)

ANHA


Mijarên Din