Şêniyên Serêkaniyê gefên dewleta Tirk şermezar kirin

Şêniyên bajarê Serêkaniyê ji bo şermezarkirina gefên dewleta Tirk ên li dijî herêmên Bakur û Rojhilatê Sûriyê meşek li dar xist û tekez kir ku gelên herêmê li dijî hemû gefên li dijî herêmê sekinîn û dê bisekinin.

Bi hezaran şêniyên bajarê Serêkaniyê ya kantona Hesekê bi armanca şermezarkirina gefên dewleta Tirk li dijî herêmên Bakur û Rojhilatê Sûriyê û bi dirûşma "Na ji dagirkeriya Tirkiyê ji herêmên Bakur û Rojhilatê û Sûriyê re" meşek li dar xist.

Îro di saetên sibê de bi hezaran şêniyên bajarê Serêkaniyê, navçeya Til Temir, Zirgan û bajarokên derdora wê her wiha endamên hemû saziyên sivîl û leşkerî li herêmê li pêşiya avahiya meclisa navçeyê kom bûn.

Di meşê de wêneyên Rêberê Gelê Kurd Abdullah Ocalan, wêneyên şehîdan, ala Kongreya Star, ala PYD`ê, her wiha pankartên "Na ji dagirkeriya Tirkiyê re" bi zimanên kurdî, erebî û suryanî hatin hildan.

Meşê ji ber avahiya meclisê dest pê kir û li taxa Ronahî veguherî mitîngê. Di mitîngê de dirûşmeyên serkeftinê û yên li dijî dagirkeriya Tirkiyê, her wiha silavkirina berxwedanê hatin berzkirin.

Di mitîngê de hevserokê Şaredariya Gel Luqman Îsa axivî û gefên dewleta Tirk a dagirker li dijî herêmên Bakur û Rojhilatê Sûriyê û bi taybet ên di demên dawîn de şermezar kir.

Luqman Îsa destnîşan kir ku her bihostek ji xaka Bakur û Rojhilatê Sûriyê bi xwîna şehîdan hatiye rizgarkirin, berxwedana Serêkaniyê dê li hember dewleta Tirk a dagirker û çeteyê wê dîsa dubare bibe.

Luqman Îsa di berdewama axaftina xwe de wiha anî ziman:"Gelê me dê li dijî gefên dewleta Tirk a dagirker li dijî herêmê bisekinin. Tu carî li hember kesên ku dixwazin aramî û ewlehiya herêmê tevlihev bikin, bê deng namînin."

Luqman Îsa di dawiya axaftina xwe de tekez kir ku gefên dewleta Tirk diyar dike ku ew di hemû aliyan de û ji wan ê leşkerî û siyasî de bin ketiye.

Mitîng bi dirûşmên silavkirina berxwedana Rêberê Gelê Kurd Abdullah Ocalan di girtîgeha Îmraliyê de û dirûşmên “Şehîd namirin”, bi dawî bû.

Hêjayî bibîrxistinê ye ku bi hezaran şêniyên Kobanê li ser sînorê li beramberî sînorê Tikiyê xwepêşandanan li dar dixin.

(bx)

ANHA


Mijarên Din