Şêniyên Helebê li dijî faşîzmê daketin qadan

Li dijî gef û êrîşên dagirkeriya Tirkiyê yên li ser herêmên Bakur û Rojhilatê Sûriyê bi sedan malbatên şehîdan li taxên Şêxmeqsûd û Eşrefiyê yên Helebê meşek li dar xist.

Li dijî gef û êrîşên dagirkeriya Tirk û di çarçoveya pêngava Koordînasyona Kongreya Star a bi slogan "Welat welatê me ye, na ji dagirkeriya Osmaniyên nû re" bi sedan malbatên şehîdan li taxên Şêxmeqsûd û Eşrefiyê meşek li dar xist.

Meşê ji pêşiya hola civînan a rojavayê taxa Şêxmeqsûd dest pê kir û ber bi rojhilatê taxê ve çû. Xwepşandêran wêneyên şehîdan hilgirtin û sloganên "Na ji dagirkeriyê re","Bimire faşîstê Erdogan", "Bijî berxwedana gelan" û "Şehîd namirin" berz kirin.

Paşê beşdar li rojhilatê taxa Şêxmeqsûd kom bûn û rêz girt. Daxuyaniya Rêveberiya Komîteya Jinan a Meclisa Malbatên Şehîdan, ji aliyê Kurdistan Alîko ve hate xwendin.

Daxuyaniyê gef û êrîşên Tirkiyê yên li ser herêmên Kurdistanê, herêmên Bakur û Rojhilatê Sûriyê û desteserkirina desthilata Tirkiyê ji şaredariyên Bakurê Kurdistanê re şermezar kirin.

Daxuyaniyê bal kişand ser kiryarên dewleta Tirk ên li dijî Partiya Gelan a Demokratîk (HDP) û wiha hate gotin: "Kiryarên dewleta Tirk dermirovî ne û beramberî vê yekê jî bêdengiyeke navdewletî heye û li ser vî esasî faşîzm reftarê xwe dê rewa bibîne û zêdetir binpêkirinan pêk bîne."

Malbatên şehîdan di peyama daxuyaniya xwe de, soza şopandina rêya şehîdan û li dijî gef û êrîşên dewleta Tirk asta têkoşîna xwe bilintir bikin, da.

Paşê endama Koordînasyona Kongreya Star Sîham Bîlal axivî û îşaret bi girîngiya çalakiya Kongreya Star kir. Sîham Bîlal got pêngav dê 6 mehan dewam bike û li dijî gefên dagirkeriya Tirkiyê dê bername û çalakiyan li dar bixin, her wiha rola jinan li dijî dagirkeriyê xurttir bikin.

(eh)

ANHA


Mijarên Din