Siyaseta partiyên kurdî mijara nîqaşên komxebata li Kobanê bû

Bernameya roja yekemîn a komxebata siyasî ya li bajarê Kobanê bi nêrînên beşaran bi dawî bû. Di komxebatê de siyasetên partiyên kurdî hate gotûbêjkirin.

Li ser banga  Yekitiya Rewşenbîrên Kantona Kobanê Komxebata siyasî ya yekemîn li Kobanê bi beşdarbûna hejmareke partiyên siyasî yên kurdî û rewşenbîran îro di saetên sibehê de destpê kir.

Komxebat bi dirûşma "Tenê bi yekitiya xwe em dikarin azadî û çarenûsa xwe bi dest bixin" li Parka Ronî War di roja xwe ya yekemîn de bi dawî bû.

Partiyên siyasî yên kurdî mîna Partiya Çepgir a Kurdî li Sûriyê (PDKS), Partiya Yekitiya Demokratîk (PYD), Partiya Yekitiya Demokratîk a Kurdî li Sûriyê (PYDKS), Partiya Demokratîk a Kurdî li Sûriyê (PDKS), Partiya Wîfaq û Partiya Demokratîk a Pêşverû ya Kurd li Sûriyê (PDPKS) û kesayetên serbixwe beşdarî komxebatê bû.

Endamê Desteya Rêveber a Partiya Yekitî ya Kurd li Sûriyê Mûsa Keno di komxebatê de axivî û destnîşan kir ku pêwîste biryarên derve yên ku bandor li siyaseta kurdî dike û dibe sedema parçebûna partiyetî derbas bikin. Her wiha girîngiya kar li ser vîna gel teqez kir.

Di nîqaşên girêdayî aliyê siyasî hinek partiyên siyasî helwestên xwe li hember arêtşa Tirk a dagirker û xeteriyên li ser gelê kurd nîşan dan.

Bi navê Partiya Yekitiya Demokratîk (PYD) Bekir Hec Îsa ragihand ku partî ji bo yekitiya mala kurdî û avakirina hevgirtina neteweyî amade ye tawîzan bide.

Ji aliyê xwe ve nivîskar Hisên Mihemed Elî got: "Hêzên siyasî ji xeteriyên ku di pêvajoyê şoreşa Rojava de li pêşiya gelê Kurd derdikevin berpirsyar in. Îro gelê Kurd ji aliyên leşkerî, aborî û îdarî cihê xwe girtiye. Êriş bi awayekî rojane dubare dibin ji bo ku zextê li gel û vîna me bikin û me bidin pêşiya du berbijarkan yanî teslîmkarî  yan jî qirkirin. Em ê tenê bi yekitiya xwe bi serkevin."

Hejmarek kesayetên ku tev li komxebatê bûne, nêrîn û rexneyên xwe li ser rola rewşenbîran a zaîf di nêzîkirina nêrînên partiyên siyasî ji bo ku bighêjin yekitiya kurdî anîn ziman.

Beşdaran roja yekemîn a komxebatê piştî nîqaşên 5 saetan bi dawî kirin. Komxebat wê roja Pêncşemê bi encamnameyekê bi dawî bibe.

(şx)

ANHA

 


Mijarên Din