Şehîd Rustem Cûdî hate bîranînan

Hevserokê Partiya Yekitiya Demokratîk (PYD) di salvegera şehadeta Rustem Cûdî de got “Li hemberî şerê taybet pêwîst e asta têkoşîn û berxwedanê were bilnidkirin. Armanca me rizgarkirina axa dagirkirî ji dewleta Tirk e."

Hevserokê PYD`ê Enwer Muslim di merasîma ku Meclisa Malbatên Şehîdan ji bo bîranîna şehîdên ku di dem û cihên cuda de şehîd bûne, di nav de şehîd Rustem Cûdî, li Goristana Şehîd Rustem Cûdî ya li Berkevirê axivî.

Enwer Muslim, endamê Meclisa Giştî ya PYD`ê Ebdulkerîm Saroxan, hevserokê Desteya Parastinê ya Herêma Firatê Îsmet Şêx Hesen û nûnerên partiyên siyasî û şêniyên Dirbêsiyê tev li merasîmê bûn.

Enwer Muslim axivî û got: “Ev neh sal e ku Rustem Cûdî şehîd bûye. Rast e şehîd bûye lê di nav me de zindî ye.”

Muslim da zanîn ku piştî Şoreşa 19`ê Tîrmehê û pêkanîna projeya neteweya demokratîk di navbera pêkhateyên Bakur û Rojhilatê Sûriyê de, ragihandina Rêveberiya Xweser, tiştekî asayî bû ku hêzên dijber di serî de AKP êrişî herêmê bike û gelên wê bike hedef.

Muslim wiha domand: “Çeteyên ku dewleta Tirk ji bo têkbirina projeya neteweya demokratîk bi kar anîne, Cebhet El-Nusra, DAIŞ û Artêşa Nîştimanî ya Sûriyê hemû li hemberî vîn û hêza pêkahteyên herêmê bi bin ketin.”

Muslim di nav axaftina xwe de behsa şerê taybet ê ku dewleta Tirk li herêmê dimeşîne, kir û got: “Li hemberî vî şerê taybet divê em asta têkoşîn û berxwedanê bilind bikin. Armanca me rizgarkirina tevahiya axa dagirkirî ji dewleta Tirk a dagirker e, mîna Efrîn, Serêkaniyê û Girê Spî û hemû herêmên dagir kirine.”

Muslim di dawiya axaftina xwe de şehîd Rustem Cûdî û tevahiya şehîdên azadiyê bi bîr anîn û soza şopandina rêya wan heta pêkanîna civakeke demokratîk û azad da.

Paşê bi navê malbata şehîd Rustem Cûdî birayê wî Xelîl Osman axivî û bixêrhatina beşdarên merasîmê kir û got: “Em bejna xwe li hemberî giyanê şehîdan ditewînin. Şehîd Rustem Cûdî ji bo azadiya gelê xwe û ji bo bi rûmet bijî canê xwe feda kir.”

Merasîm bi berzkirina dirûşmên dilsoziya bi şehîdan re bi dawî bû.

ANHA


Mijarên Din