Şaredariya Şedadê pirsgirêka avê bi awayekî demkî çareser kir

Şaredariya Gel a Şedadê bi buhayên guncaw, bi sarincan avê li şêniyan belav dike. Li aliyekî din şaredarî hewl dide xebatên xwe yên sererastkirina stasyona ava Şedadê bi dawî bike.

Artêşa Tirk a dagirker û çeteyên wê gelek caran stasyona Elûk kir hedef. Di encamê de xirab bû û av li ser herêmê qut bû. Şaredariya Gel a Şedadê ji bo çareserkirina vê pirsgirêkê avê, bi rêya sahrîcan avê ji şêniyan re peyda dike.

Li cem şaredariyê 8 sahrîc hene, tevî 15 sahrîcên taybet ku şaredariyê bi wan re peymanên mehane îmze kirine. Ev sahrîc avê ji bîrên Hesekê tînin û bi rêya komînan avê li şêniyan belav dikin. 5 bermîl av bi hezar û 500 lîreyên Sûriyê tê belavkirin. 23 sahrîc, avê li ser zêdetirî 600 gundên girêdayî navçeyê belav dikin.

Girêdayî mijarê cîgirê hevserokatiya Şaredariya Gel Husam El-Taan got: "Piştî bidawîkirina xebatên sererastkirina stasyona avê ya Şedadê, wê pirsgirêka avê li herêmên Hesekê û gundewarên başûr çareser bibe."

El-Taan destnîşan kir ku artêşa Tirk a dagirker û çeteyên wê ev cara heftan e ku ava stasyona Elûk qut dikin. Ji ber wê li herêmê pirsgirêka avê derket.

Li herêmên Şedadê û gundewarên wê bîrên ava vexwarinê tune ne, ji ber wê xebatên veguhestina avê ji bîrên Hesekê ber bi gundên navçeyê ve 6 saet dirêj dikin.

(şx)

ANHA


Mijarên Din