Salvegera damezrandina Hevbendî li Şehbayê hate pîrozkirin

5‘emîn salvegera damezrandina Hevbendiya Niştimanî ya Demokratîk a Sûriyê li navçeya Fafînê ya katona Şehbayê hate pîrozkirin.

Şaxê herêma Efrînê ya Hevbendiya Niştimanî ya Demokratîk a Sûriyê bi boneya salvegera xwe ya 5‘emîn şahiyek li navçeya Fafînê ya kantona Şehbayê li dar xist. Bi dehan rûspiyên êlan, endamên sazî û meclisên Herêma Efrînê di şahiyê de amade bûn.

Şahî bi deqeyeke rêzgirtinê dest pê kir. Dûvre rêveberê Hevbendiya Niştimanî ya Demokratîk a Sûriyê Abdurehman Murşid, rêveberê Buroya Jinan a hevbendiyê Roşîn Mamo, bi navê partiyên li herêma Efrînê Şirîn Qaso û bi navê rûspiyên êlan Elî Mehmûd û Mihemed Elûş axivîn. Kesên axivîn salvegera damezrandina hevbendiyê li tevahî beşdar û gelên herêmê pîroz kir û tekez kir ku armancên hevbendiyê yên gihandina ber bi Sûriyeyeke demokratîk a piralî ve, afirandina rewşeke nû li Sûriyê ku çanda piralî û cihêrengiyê damezrîne sabit in.

Di axaftinan de bal hate kişandin ser girîngiya diyalogên navxweyî ji bo xilaskirina Sûriyê ji krîzê û hate destnîşnkirin ku diyalog rêya yekane ya rizgarkirina ji aloziyê  ye, piştî ku tevahî dewletên cîhanê ti çarserî peyda nekirin. Her wiha hate gotin hewldanên derve tenê berjewendiyên teng û ajindeyên siyasî ne.

Şahî bi xwendina helbest û stranan bi dawî bû.

(fr)

ANHA


Mijarên Din