Şahiya salvegera rizgariya Kobanê bi dawî bû

Şahiya li Kobanê ya salvegera 5`emîn a rizgarkirina bajêr ji DAIŞ`ê û 6`mîn salvegera ragihandina Rêveberiya Xweser a Kobanê bi dawî bû.

Şêniyên bajarê Kobanê îro salvegera 5`emîn a rizgarkirina bajêr ji DAIŞ`ê û 6`emîn salvegera ragihandina Rêveberiya Xweser a Kobanê pîroz kirin û bi hezaran şêniyên herêmê ji Kurd û Ereban di şahiyç de amade bûn.

Şahî li Qada Şehîd Egîd li dar ket û gelek kes di şahiyê de axivîn. Hevseroka Meclisa Qanûnsaz a Herêma Firatê Fewziyê Ebdî bi navê tevger û saziyên jinan ên li herêmê axivî û wiha got: "Kobanê bû sembola aştî û mirovahiyê, ji wê çirûska rizgarkirina hemû herêmên Bakur û Rojhilatê Sûriyê ji çeteyên DAIŞ`ê dest pê kir û heta Baxozê ku xeleka dawîn di şerê li dijî hebûna leşkerî ya DAIŞ`ê bû, dewam kir."

Fewziyê wiha domand: "Li pêşiya gefên dewleta Tirk ên li ser herêmê, divê dewleta Sûriyê parastina serweriya sînorê wê bike. Em daxwazê ji Rûsya û Amerîkayê her du dewletên garantor ên hevpeymanan li Bakur û Rojhilatê Sûriyê dikin ku bixebitin da ku gefên Tirkiyê rawestînin û mîsogeriya vegera koçberan li herêmê wan bikin."

Fewziyê di dawiya axaftina xwe de îşaret bi girîngiya hevgirtin û tekoşînê ji bo têkbirina  hemû hevpeymanên li dijî berjewendî û hebûna gelê herêmê kir.

"BERXWEDAN BERDEWAM E"

Her wiha seroka Desteya Jinan a Rêveberiya Xweser a Bakur û Rojhilatê Sûriyê Cîhan Xidro axivî û wiha got: "Dîroka rizgarkirina bajarê Kobanê çirûskek e ji gelên herêmê re ku îradeya wan ji hemû alavên leşkerî xurtir e.”

Cîhan wiha domand: "Hîna berxwedana li dijî damezirînerê DAIŞ`ê anku Tirkiyê ku hewl dide îro bi hincetên cuda vî bajarî dagir bike, didome."

Di şahiyê de gelek koman stranên bi kurdî û erebî gotin. Nûnerê Rêveberiya Sivîl a Demokratîk a Minbicê xelatek diyarî rêveberiya Kobanê ji bo berxwedana wan kir. Şahî bi gerandina govendê bi dawî bû.

(jo)

ANHA


Mijarên Din