Rêveberiya Xweser serdana kampa Waşokanî kir

Şandeyek ji Rêveberiya Xweser a Bakur û Rojhilatê Sûriyê serdana kampa "Waşokanî" kir, şandeyê daxwaz ji hemû rêxistinên mirovî û dewletên cîhanî kir ku li pêşiya êrişên dewleta Tirk a dagirker û çeteyên wê bisekinin û koçberan vegerînin warên wan.

Di çarçoveya şopandina kar û barên koçberên ji herêmên sînor ji ber êrişa Tirkiyê û yên li kampa "Waşokanî", ku li Hesekê hate vekirin, dimîn de, nexasim jî hê jî pêla koçberiyê li bajêr zêde dibe, îro  şandeyek ji Rêveberiya Xweser a Bakur û Rojhilatê Sûriyê serdana kampa ku 12 km li rojavayê navenda kantona Hesekê ye, kir.

Şande ji 2 endamên Koordînasyona Kongreya Star Foza Yûsif û Zeyneb Efrînê, hevserokê Meclisa kantona Hesekê Abdullxenî Oso û hevseroka Desteya Kar û Barên Koçberan a Herêma Cizîrê Gulistan Oso, pêk dihat.

Di hevdîtina bi Koordînasyona Kongreya Star Foza Yûsif re, wiha got: "Alîkariya destpêkê ji koçberan re ku dewleta  Tirk a dagirker û çeteyên wê ji Serêkaniyê bê derxistin û koçber li malên xwe bên vegerandin."

Foza Yûsif wiha domand: "Armanca dewleta Tirk ji dagirkirina herêmên Bakur û Rojhilatê Sûriyê, kuştin û perîşankirina gel e. Her wiha guhartina demografiya herêmê û bi cihkirina çeteyan li şûna şêniyan e."

Her wiha Foza Yûsif destnîşan kir ku siyaseta qirkirin û guhertina demografiyê ku dewleta Tirk a dagirker pêk tîne, xeteriyê li ser pêşeroja herêmê çêdike, her wiha jî pêşî li koçberkirina bi hezaran şêniyên herêmê ji malên xwe vedike.

Foza da zanîn ku dewleta Tirk a dagirker hevpeymana agirbestê pêk neanî. Her wiha heta niha hemû dewletên cîhanê bêdeng in û gavek jî ji bo vegera koçberan neavêtin.

Foza wiha domand: "Divê herêm di bin parastina hêzên navneteweyî be, da ku vegerin bajarê xwe û dewleta Tirk û çeteyên wê dûrî Bakur û Rojhilatê Sûriyê bixin."

Foza Yûsif koçberiya şêniyan bi "karîseta mirovahiyê" bi nav kir û wiha got: "Dewleta Tirk hewl dide demografiya herêmê biguhere. Divê dewletên cîhanê komîteyekê ava bikin, da ku rewşa koçberan bişopînin û wan vegerînin malên wan. Eger komîte neyê avakirin, wê demê dê dewletên cîhanê hevkarê karîseta mirovî ku rastî şêniyên Bakur û Rojhilatê Sûriyê tê, bin."

Di dawiya axaftina xwe de Foza daxwaz ji dewletên cîhanê kir ku li pêşiya êrişên dewleta Tirk bisekinin û şêniyan vegerînin warên wan.

(jo)

ANHA


Mijarên Din