Rûsyayê ragihand ku hevkariya wan a bi NATO`yê re sekiniye

Wezîrê parastinê yê Rûsyayê Sergey Şoygu tekez kir ku têkiliyên Rûsya-NATO`yê ber bi xirabbûnê ve diçin û hevkariya her du aliyan sekiniye.

Wezîrê parastinê yê Rûsyayê bi rêya televîzyonê wiha axivî: "Ne tenê her tişt sekinî, lê belê rewş her sal xirabtir dibe."

Li ser pirsa ‘çima têkiliyên Rûsya û NATO`yê li ber ketinê ne?’ Şoygu wiha bersiv da: "Berî 5 salan hevkariyeke me ya pir xurt bi Brukselê re hebû. Nûnerê Rûsyayê jî li gel NATO`yê heye. Lê îro ev hevkar bi Amerîkayê re ji peyman û lihevkirinan vedikişin. Qada ewlehiyê jî her ku diçe tengtir dibe."

Rûsyayê metirsiya xwe der barê zêdekirina NATO`yê ya lêçûnên xwe yên leşkerî di lûtkeya xwe ya dawîn de, anîbû ziman.

NATO`yê ji bo parastina dewletên Baltîk planek amade kiribû, Rûsya jî vê yekê li dijî berjewendiyên xwe dibîne. Tirkiye jî bi rêya şantaja NATO`yê ji bo xistina Yekîneyên Parastina Gel (YPG) nava lîsteya terorê ku Amerîkayê ev yek qebûl nekir, hewl da ku vê planê asteng bike.


Mijarên Din