Piştî serdana Şoygu ji Şamê re Îran hêza xwe li Idlibê zêde dike

Çavkaniyan got hêzên girêdayî Îranê baregehên xwe yên leşkerî ji Cebel El-Zawiye heta gundewarên Hema û gundewarên Helebê ku beriya biryara agirbestê gihîştibûn wir, xurt dike. Ev yek piştî serdana wezîrê parastinê yê Rûsya Şoygu ji Şamê re, pêk hat.

Navenda Çavdêriya Mafên Mirovan a Sûriyê (SOHR) ji çavkaniyan ragihand kuk hêzên girêdayî Îranê baregehên xwe yên li derdora bajarê Seraqib ê gundewarên rojhilatê Idlibê, navenda bajarê Kefer Nibul a gundewarên başûrê Idlibê û nuqteyên din li Cebel El-Zawiyê, xurt dike.

Li gorî çavkaniyên SOHR`ê, hêzên bi navê “313” li derdora Kefer Nibulê belav dibin. Ew hêz desteka xwe ji Îranê digirin û Îran wan fînanse dike. Her wiha li navenda bajarê Seraqib hêzên bi navê ‘El-Ridwan’ belav dibin ku bi temamî girêdayî Hizbullah a Lubnanê ne û li derdora Seraqibê hêzên Iraqê yên alîgirên Îranê belav. Wê hêzê her wiha nuqteyên xwe li derdora çiyayê Şehşebo yê bakurê rojavayê Hemayê xurt kir û hêza bi navê ‘Fuc El-Nebî El-Ekrem’ li wir belav kir.

Hêzên alîgirên ‘Pasdarên Îranê’ jî nuqteyên xwe xurt kirin û sewqiyatên leşkerî anîn herêma El-Îs a gundewarên başûrê Helebê û li hin nuqteyên nû li derdora herêmê belav bû. Her wiha çekên giran şand hemû herêmên navborî.

Di heman derbarê de, SOHR`ê ragihand ku hêzên rejîmê di saetên derengiya şeva duşemê de tevî biryara agirbestê herêmên El-Bara, Avis û Kefer Eweyid ên başûrê Idlibê, bi moşekan bombebaran kir.

Komên çete bersiva bombebaranê dan û navendên rejîmê yên li Seraqib û Kefer Nibul bi gelek moşekan bombebaran kirin. Her wiha balafirên keşfê yên Rûsyayê li asîmanê herêma Cebel El-Zawiye ya gundewarên başûrê Idlibê geriyan.

Ev yek piştî serdana wezîrê parastinê yê Rûsyayê Sergey Şoygu ji Şamê re û hevdîtina bi Beşar El-Esed re ya ji bo nîqaşkirina geşedanên dawî li Idlib û Sûriyê, pêk hat. 

Çavkaniyên ji Şamê ji rojnameya El-Ereb re destnîşan kir ku di serdanê de îhtîmala xebateke leşkerî ya hevbeş a Rûsya-Tirkiyê û Sûriyê bêyî beşarbûna Îranê, xuya kiriye.

Îran ji tevgerên siyasî yên der barê aloziya Sûriyê de hat dûrxistin û beşdarî civînên Astanayê nehat kirin ku yek ji damezînerên civînan bû. Lewra çavdêr der barê nêzîkatiyên Rûsya û Tirkiyê de ji aliyekî ve û Rûsya û Amerîka ji aliyekî din ve, metirsiyên xwe nîşan didin.

(bx)

ANHA


Mijarên Din