Mamosteyên Serêkaniyê êrîşên Tirkiyê yên li ser Başûr şermezar kirin

Komîteya Perwerdeyê ya Civaka Demokratîk (KPC-D) a Serêkaniyê bi daxuyaniyekê êrîşên dewleta Tirk şermezar kirin û ji dewleta Iraqê û hikumeta Başûrê Kurdistanê daxwaz kir ku ji bêdengiya xwe ya der barê êrîşên dagirkeriya Tirkiyê yên li ser herêmên Başûrê Kurdistanê derkevin.

Komîteya Perwereyê ya Civaka Demokratîk (KPC-D) a Serêkaniyê daxuyaniyeke nivîskî ji raya giştî re weşand ku êrîşên dagirkeriya dewleta Tirk a li ser herêmên Başûrê Kurdistanê şermezar kir û tekez kir armanca dewleta Tirk ji van êrîşan ew e ku destkeftiyên ku ciwanên herêmê li tevahî parçeyên Kurdistanê bi giştî û Başurê Kurdistanê bi taybet pêk anîne, têk bibe.

Îro danê sibehê bi dehan mamosteyên bajêr û endamên Meclisa Serêkaniyê ku wêneyên Rêberê Gelê Kurd Abdullah Ocalan, wêneyên şehîdên HPG’ê, alên KPC-D û TEV-DEM’ê rakiribûn, li pêş Navenda Şehîd Roşîn a taxa Ronahî kom bûn û daxuyaniyek da.

Daxuyanî ji hêla endamê rêveber ê KPC-D’ê yê herêmê Mihemed Haco ve hat xwendin.

Di daxuyaniyê de Haco dijminahiya Tirk şermezar kir û wiha got: "Em êrîşên dewleta Tirk ên li dijî Herêmên Parastinê yên Medyayê yên li Başûrê Kurdistanê şermezar dikin. Lê belê mîna van êrîşan nikarin li hember berxwedan û vîna gelê me li ber xwe bidin, lê berovajî wê israr û berxwedanê zêde dikin."

Haco wiha pê de çû: "Em hemû dizanin ku armanc ji êrîşên dewleta Tirk ew e ku destkeftiyên ku ciwanên herêmê li tevahî parçeyên Kurdistanê bi giştî û Başûrê Kurdistanê bi taybet bi dest xistine, têk bibe. Li rexê jî dibe ku şênî û gelên herêmê bibin qurbaniyên van êrîşan."

Di berdewama daxuyaniyê de Haco wiha got: "Li ser vê bingehê, em wek KPC-D bang li tevahî gelên li tevahî parçeyên Kurdistanê dikin ku serî li hember van êrîşên dewleta Tirk hildin û her derê vegerînin qadên berxwedan û serkeftinê."

Di daxuyaniyê de bang li dewleta Iraq û hikumeta Başûrê Kurdistanê hat kirin ku ji bêdengiya der barê van êrîşan de derkevin.

(fr)

ANHA


Mijarên Din