Li Şehbayê 2 fermandarên artêşa Tirk hatin kuştin

Hêzên Rizgariya Efrînê daxuyand ku di çalakiyên wan ên duh ên li dijî artêşa Tirk a dagirker û çeteyên wê de li Şehbayê 2 fermandarên artêşa Tirk û 3 çete hatine kuştin.

Hêzên Rizgariya Efrînê (HRE) bi daxuyaniyeke nivîskî der barê çalakiyên xwe yên duh de agahî dan. HRE’yê diyar kir ku hêzên wan rêzeçalakiyên sabotajê li dijî artêşa Tirk a dagirker û çeteyên wê pêk anîne û di çalakiyan de 2 fermandarên artêşa Tirk û 3 çete hatine kuştin.

Daxuyaniya HRE’yê wiha  ye:

“Di 10’ê Cotmeha 2019 de hêzên me rêzeçalakiyên sabotajê yên bibandor li Efrîn û Şehbayê li hemberî artêşa Tirk a dagirker û çeteyên wê li dar xistin. Di vê çarçoveyê de;

1. Li gundê Meryemin ê girêdayî navçeya Şera roja 10’ê Cotmehê bi şev hêzên me çalakiyeke sabotajê li dijî artêşa Tirk a dagirker û çeteyên wê li dar xist. Di encama çalakiyê de 2 çete hatin kuştin

2. Li gundê Jarez ê girêdayî herêma Ezazê roja 10’ê Cotmehê hêzên me li dijî berpirsên çeteyên Polîsên Leşkeri û qaşo endamên konseya ewlehiyê çalakiyeke sabotajê li dar xist. Di encamê de ew çete hat kuştin.

3. Li gundê Til Medîq û Semûqa yê girêdayî herêma Şehba roja 10’ê Cotmehê bi şev hêzên me 2 çalakî li dijî baregehên artêşa Tirk a dagirker û çeteyên wê li dar xistin. Di encamê de 2 fermandarên artêşa Tirk hatin kuştin her wiha obuseke artêşa Tirk hat rûxandin.

4. Di heman demê de li gundê Til Malid ê girêdayî bajarê Mare li dijî barageheke artêşa Tirk a dagirker û çeteyên wê hêzên me çalakiyeke sabotajê li dar xist, lê belê encamên çalakiyê nehatin zelalkirin.

Piştî rêzêçalakiyên hêzên me artêşa Tirk a dagirker û çeteyên wê li gundên Başemrê, Kilûtê, Birc Qasê, Gundê Mezin, Soxanekê û Bênê yên girêdayî navçeya Şêrewa û gundên Merenaz, Malikiyê û Şewarixa yên girêdayî navçeya Şerayê, her wiha gundên Hirbil, Til Medîq, Semûqa û Bendava herêmên Şehba ku bi hezaran sivîl lê dijîn, bi obus û hewanan topbaran kirin.”