Li Kobanê çalakiyên li dijî gefên Tirkiyê didomin

Li dijî gefên Tirkiyê yên li ser herêmên Bakur û Rojhilatê Sûriyê, dîsa bi sedan şêniyên kantona Kobanê li rojavayê kantonê li beramberî sînorê Tirkiyê çalakî kirin.

Li dijî kiryar û daxuyaniyên dewleta Tirk ên dawîn ên li ser herêmên Bakur û Rojhilatê Sûriyê bertek ji aliyê gel ve berdewam in. Bi hezaran şênî li gelek gund û bajarokan di van du rojên dawîn de beşdarî çalakiyan dibin.

Piştî çalakiya li gundê Qeremox ê rojhilatê bajarê Kobanê, şêniyên gundên rojavayê kantonê li dijî gefên Tirkiyê û xurtkirina hêzên xwe li ser sînorê di navbera Sûriyê û Tirkiyê de çalakî kirin.

Îro ji saetên sibehê de şêniyên gundê rojavayê kantona Kobanê beşdarî konê çalakiyê bûn ku li gundê El-Ziyara raserî bajarê Cerablus ku ji aliyê Tirkiyê ve dagirkirî ye û ji kampên artêşa Tirkiyê bi dûrahiya 500 metreyan e, bûn.

Di çalakiyê de endama Meclisa Navçeya El-Qinaya Sûaad Şêx axivî û wiha got: "Divê ji bo destwerdanên leşkerî em hişyar bin, her wiha divê gelên me baş bizane ku guhartina demografîk û xerabkirina têkiliyan di kêliyan de çêdibin, ji ber vê yekê divê em xwe nespêrin dewletên kaolîsyonê yên li ser xaka me, lê em xwe bispêrin xwe û destwerdana Tirkiyê dê rastî bersiveke deh qatî bersiva li Efrîn a Berxwedana Serdemê were."

Paşê li dijî destwerdanên Tirkiyê, çalakgeran bi dirêjahiya bi sedan metreyan mertalên zindî ava kirin.

Çalakiya li gundê Qeremox ê rojhilatê kantonê û nêzî sînorê Tirkiyê, bi beşdariya şêniyên ji hemû gundên kantonê berdewam dike.

Hêjayî bibîrxistinê ye ku li hemû herêmên Bakur û Rojhilatê Sûriyê çalakiyên li dijî daxuyaniyên dewleta Tirk ku gefan li herêmê dixwe, didomin.

(eh)

ANHA


Mijarên Din