Li Kabulê êrîş: 63 kuştî û 182 birîndar

Di şahiyeke li rojavayê paytexta Efxanistanê Kabulê, êrîşkarekî xwe teqand û di encamê de 63 kes hatin kuştin û 182 kes jî birîndar bûn. Tevgera Talîbanê êrîş şermezar kir û diyar kir ku destê wan di êrîşê de tune ye.

Hikumeta Efxanistanê îro sibehê ragihand ku di êrîşa duh de ku li dijî şahieke li Kabulê pêk hat, 63 kes hatine kuştin û 182 kes birîndar bûn.

AFP`ê li ser zimanê berdevkê Wezareta Hundirîn a Efxanistanê Nesret Rehêmî wiha ragihand: "Di nav qurbaniyan de, zarok û jin hene."

Êrîş saet di 22:40’an de li Hola Şar Dubai ya şahiyan pêk hat.

Tevgera Talîban îro sibehê êrîş şermezar kir û diyar kir ku destê wan di êrîşê de tune ye. Berdevkên tevgerê li ser Twitterê wiha nivîsand: "Tevger bi tundî vê êrîşa li dijî sivîlan a li Kabulê şermezar dike. Çalakiyên mîna kuştina qesdî û hovane, mîna vê êrîşê û hedefgirtina jin û zarokan, armanc jê çi ye!"

Teqîna duh li rojavayê Kabulê pêk hat, di demekê ku DYA û tevgera Talîban di pêvajoyên dawîn di dan û standinan de ji bo hevpeymana kêmkirina hêzên Amerîkayê li Efxanistanê.

(jo)

 


Mijarên Din