Li Girê Spî ji bo bi rêxistinkirina ciwanan civînek hate lidarxistin 

Di bin konê çalakiya mertalên zindî ya li Girê Spî de Koordînasyona Giştî Tevgrea Ciwanên Şoreşa a Sûriyê bi ciwanên kantonê re civiyan. Di civînê de li hemberî gef û êrîşên dagirkeriyê banga zêdekirina rêxistinbûyînê li ciwanan hate kirin.

Çalakiya mertalên zindî ya li gundê Minbetih ê kantona Girê Spî li dijî gefxwarinên dewleta Tirk  a dagirkere ên êrîşkirina herêmên Bakur û Rojhilatê Sûriyê didome.

Koordînasyona Giştî ya Tevgera Ciwanên Şoreşger a Sûriyê civînek ji ciwanên kantonê re li dar xist.

Endamê Koordînasyona Giştî ya Tevgera Ciwanên Şoreşger a Sûriyê Harûn Apoyî û bi dehan ciwanên Girê Spî tev li civînê bûn.

Civîn bi deqeyek rêzgirtin destpê kir, piştre Harûn Apoyî axivî û bang ciwanên kantonê kir ku li hemberî gefên dagirkeriya Tirk ên li ser herêmê bisekinin.

Harûn Apoyî wiha domand: "Wek ciwanên Girê Spî divê em tedbîrên xwe ji bo parastina bajêr û gelê xwe bigirin. Em li benda ti dewletan nemînin da ku me biparêzin. Erka parastina welat û gel di radeya yekemîn de dikeve ser milê ciwanan."

Apoyî pêvajoya heyî ku herêm tê re derbas dibe bi pêvajoya ku şoreşa Yûsif El-Ezma, Şêx Salih El-Elî û Ibrahîm El-Henano şiband û got: "Ew pêvajo; pêvajoya sekinandina li hember dagirkeriyê û her kesê ku hewl dida Sûriyê dagir bike û gelê wê bike kole bû. Lewra divê em asta têkoşîn û berxwedanê li hember tevahiya aliyên ku hewl didin herêmên me dagir bikin mezin bikin."

Piştî bidawîbûna civînê ciwanan bi erebeyan di nav kolanên taxên sereke yên Girê Spî de geriyan û dirûşmeyên şermezarkirina gefên Tirkiyê berz kirin.

(şx)
ANHA


Mijarên Din