Li dijî bêewlehiya li herêma Babê şêniyên bajêr daketin qadan

Piştî rêzeteqîn û rewşên revandinê yên li bajarê Babê rû dan, şêniyên bajarê Babê li dijî bêewlehiya li herêmên dagirkirî daketin qadan.

Duh li bajarê Babê teqînekê rû da û artêşa Tirk da ku QSD`ê reş bike û kiryarên çeteyên xwe yên şer û teqînên bi armanca qirkirinê pêk tînin, binixumîne, QSD tawanbar kir ku wê teqîn pêk aniye.

Lê Navenda Çavdêriya Mafên Mirovan a Sûriyê îdiayên artêşa Tirk derewandin û piştrast kir ku kesê teqîn pêk aniye, berê endamê DAIŞ’ê bû û paşê beşdarî nava çeteyên El-Hemzat bû ku artêşa Tirk piştgiriya wan dike.

Şêniyên bajarê Babê li dijî kiryarên artêşa Tirk û çeteyên wê daketin qadan û ji şevê din ve, li ber avahiya polîsan protosto dikin. Îro jî greva giştî li bajar heye û dikan hemû hatine girtin.

Îro jî şêniyên bajarê Babê daketin qadan û girseya gel li pêşiya avahiya çeteyên polîsên leşkerî kom bûn. Çeteyan ji bo çalakiyê ji hev belav bike, panzêr û hêza xwe amade kirin. Çalakgeran sloganên "Mirin û nerezalet" berz kirin.

Di dîmenan de ku ajansa me bi dest xistine ,hêrsa xwepêşandêran ji dîtina çeteyan re û daxwaza danîne maskan dikin, her wiha xwepêşandêran êrişî panzêran kir û hewl da deriyê sereke derbas bikin. Di vê kêliyê de xwepêşandêran sloganên "Xiyanet..xiyanet" berz kirin û bi yekdengî gotin daxwaze wan ew e ku aramî û ewlehî li herêmê mîsoger bibe.

Di heman demê de çeteyan hewl da rê li pêşiya hêrsa çalakgeran bigirin û gefa înfazkirinê li wan xwarin. Heta van kêliyan li bajarê Babê çalakiyên protostoyê berdewam in.

(eh)

ANHA


Mijarên Din