Li benda vegera li mala xwe ye

Rêwîtiya koçberiyê ji Serêkaniyê dest pê kir û ew gihand bajarê Minbicê. Ya ku barê wê giran dike, hevser û zarokên wê yên astengdar in. Mîna bi hezaran şêniyan li bendê ye vegere warê xwe, helbet piştî ku dagirkerî jê derkeve.

Ji ber êrişên artêşa Tirk a dagirker û çeteyên wê li dijî herêmên Bakur û Rojhilatê Sûriyê bi hezaran şênî ji warên xwe ber bi herêmên ewle ve koçber bûn.

Ji ber êrişa Tirkiyê ya domdar li dijî bakurê Sûriyê, piştî ku Tirkiyê û çeteyên wê Serêkaniyê û Girê Spî dagir kirin, şêniyên wan herêman dan koçberkirin. Hejmara malbatên ku ji Serêkaniyê û Girê Spî ber bi bajarê Minbicê ve koçber bûne gihaşt 380 malbatan.

Ji wan malbatan, malbata Meha Ehmed Mirî (48) ya ji bajarê Serêkaniyê, dayika 3 keçan û kurekî ye.

Tişta ku barê Meha giran dike, nexweşiya hevser û zarokên wê ye. Li gorî bijîşkan sedema nexweşiyan genetîk e. Kurê Meha Mihemed ji çavên xwe astengdar e û di 3 saliya xwe de kor bûye. Keça wê Hemîde (22) ji jidayikbûnê ve bi nexweşiya mejûtevn ketiye û Emîne (20) tenê bi gurçikekê ye.

Keça wê ya biçûk (9) di mêjiya xwe de astendar e û hevserê wê Hisên El-Ehmed (60) ji lingê xwe astendar e û nikare bimeşe.

Malbat li gundê Til Helef yê girêdayî bajarê Serêkaniyê dima. Debara xwe bi çandiniyê û sewalkariyê peyda dikir. Lê piştî ku gund hate dagirkirin, bê debar ma.

Ji ber topbarana artêşa Tirk a dagirker û çeteyên wê tişta ku ji zarokên xwe re ava kiriye, hilweşî. Ji ber topbaranê Meha û zarokên xwe ji komkujiyên artêşa Tirk a dagirker û çeteyên wê xilas kirin.

Meha dibêje: "Li gorî hinek xizmên me artêşa Tirk a dagirker û çeteyên wê piştî ku mala min talan kir,  agir pê xist û her tişt şewitand.  Zeviyên min desteser kirine.”

Meha û zarokên wê bi hewcedariya alîkariyê ne û mîna bi hezaran koçberan li bendê ye ku vegere mala xwe.

(şx)

ANHA


Mijarên Din