Koronavîrus ji ber sersariyê zûtir belav dibe

Tevî li herêmên Bakur û Rojhilatê Sûriyê ji ber Koronavîrusê qedexeya derketina derve hatiye ferzkirin û her roja ku diçe hejmara nexweşên Koronavîrusê zêde dibe, lê dîsa jî şêniyên navçeya Dêrikê bi baldarî nêzî vê nexweşiyê nabin û tedbîrên Rêveberiya Xweser ragihandine bi cih naynin.

Li Bakur û Rojhilatê Sûriyê hejmara kesên bi Koronavîrusê dikevin zêde dibe û zû li herêman berbelav dibe. Lewma heta 20`ê vê mehê wê qedexeya derketina derve berdewam be.

Tevî vê yekê bazara Dêrikê zêde qerebalix e, pabendiyê bi tedbîrên xweparastina ji vîrusê nakin û dema pêwîstiyên xwe dikirin, lepik û maskan bi kar anîn.

Nûçegihanên me li bazara Dêrikê geriyan û têkildarî pandemiyê û bandora wê ya li ser şêniyan hevdîtin bi çend dikandar û şêniyan re çêkir. Xwediyê dikana kel û pelan Sebrî Abdullah diyar kir divê şênî xwe, malbata xwe û civaka xwe ji vê pandemiyê biparêzin.

Sebrî Abdullah got: “Ji dema Rêveberiya Xweser li Bakur û Rojhilatê Sûriyê qedexeya derketina derve ragihandiye me tedbîrên pêwîst girtine. Nexasim dema ku em kirîn û firotinê dikin.”

Abdullah bang Ii welatiyan kir ku dema li bazarê digerin û pêwîstiyên xwe werdigirin dûrî hev bikevin û bi vê yekê parastina herêmê bikin.

Mihemed Emîn, xwediyê dikana sebzeyan jî wiha got: “Rêya parastinê ya herî baş ew e ku kes ji hev dûr bisekinin.”

Têkildarî tedbîrên xweparastina ji vîrusê hevserokê Heyva Sor a herêma Şerqiye Ehmed Şêxmûs got Heyva Sor tedbîrên pêwîst girtine, li pêşiya navendên Heyvê kon vegirtine û dema nexweş tên wan derman dikin.

Ehmed Şêxmûs wiha li axaftina xwe zêde kir: "Endamên Heyva Sor a Kurd perwerde dîtine, çawa mask û lepikan li xwe bikin, xwe dûrî nexweşan bixin û heke nîşane li nexweşan hebin ew ê nexweş dûr bixin û testên pêwîst jê re çêkin."

Ehmed Şêxmûs bang li şêniyan kir ku bi çavekî biçûk li vê nexweşiyê nenêrin, ji ber ku li tevahiya cîhanê berbelav bûye û bi hezaran kesan jiyana xwe ji dest daye. Ji ber vê yekê divê dûrî kombûnan bikevin, dûrî hev bikevin.

(eh)

ANHA


Mijarên Din