Konferansa Yekitiya Rewşenbîrên Minbicê dest pê kir

Îro Konferansa Duyemîn a Yekitiya Rewşenbîrên Minbic û Gundewarên Wê bi dirûşma “Çand sembola nirx û şaristaniyê ye” li Navenda Çand û Hunerê ya Minbicê dest pê kir.

Endamên saziyên girêdayî Rêveberiya Sivîl a Demokratîk, helbestvan, rewşenbîrên Kurd, Ereb, Tirkmen û Çerkes tev li konferansê bûn.

Li hola konferansê, wêneyên şehîd Hena Şerif, her wiha wêneyên helbestvanên Minbicê hatin daliqandin.

Piştî dîwan hate hilbijartin, bi navê Rêveberiya Sivîl a Demokratîk a Minbic û Gundewarên Wê, Cahid Hesen axivî û diyar kir ku wan beşek ji erdnîgariya Sûriyê rizgar kirine, lê planên wan ji bo avakirin û pêşketina civakê hene.

Têkildarî mekanîzmaya ewlehiya sînor, Cahid Hesen wiha got: “Mekanîzmaya parastina sînor armanc dike ku herêmê biparêze û rê li pêşiya dagirkirina herêmên me were girtin. Me kûrahiya vê mekanîzmayê heta 5 km erê kir. Di aliyê leşkerî yan jî siyasî yan jî dîplomatîk de me wekî herêmên Bakur û Rojhilatê Sûriyê gavên mezin avêtin.”

Têkildarî rewşa Idlibê jî, Hesen got: “Mijara Idlibê veguherî mijareke navneteweyî û ne girêdayî aliyên ku li Idlibê hene. Idlib girêdayî hevsengiyên navneteweyî ne û texmîn dikin ku wê mijara Idlibê wê heta demeke din dirêj bike.”

Hevserokê Yekitiya Rewşenbîran Ehmed Yûsif, yek ji rêveberên Meclisa Jinan Hela Hesen û endama Meclisa Malbatên Şehîdan a Minbic û Gundewarên Wê Kefa Elî der barê girîngiya konferansê de axivîn.

Her wiha nameyên pîrozbahiyê jî hatin xwendin û piştre rapora salane ya yekitiyê hate xwendin.

Konferans bi nîqaşan dewam dike.

(kc)

ANHA


Mijarên Din