Komîteya Perwerdeyê ya Minbicê xebatên pêşxistina perwerdeyê didomîne

Komîteya Perwerde û Fêrkirinê ya Minbic û Gundewarên Wê li Dibistana Un El-Dadat a li bakurê bajêr beşeke din zêde kir da ku qerebalixa di nav refên dibistanên seretayî de kê bike.

Komîteya Perwerde û Fêrkirinê ya Minbic û Gundewarên Wê havîna çûyî gelek xebatên amadekariya pêşwazîkirina sala xwendinê ya 2019-2020’an pêk anîn. Komîteyê bi hemû derfetên heyî dibistanên bajêr û gundan sererast û amade kirin.

Gundê Un El-Dadat li nêzî xeta di navbera herêmên rizgarkirî ji Minbic û bajarê Cerablusê ye, îsal dibistanên wê pêşwaziya 750 xwendekaran dike, lê ji ber encama zexta li ser 9 refên berê, Komîteya Perwerde û Fêrkirinê mulheqek ji dibistanê re çêkir. Mulheq ji 4 holan pêk tê û hemû pêdiviyên pêwîst tê de hene.

Berpirsê rêveberiya giştî ya dibistanan a Komîteya Perwerde û Fêrkirinê Hesen Ebdellah got: "Sedema sereke şopandina perwerdeyê li gundewaran e, ev gava yekemîn e û dê gelek gavên din dê hebin, armanc jê zêdekirina çalakiyên perwerde û fêrkirinê li bajar û gundan e."

Ebdellah wiha domand: "Hewldanên Komîteya Perwerde û Fêrkirinê şopandina xebatên vê herêmê ku berê perwerde lê rawestiyabû, dê encamên baş li ser şêniyên vê herêmê pêk werin."

Hevserokê Komîteya Perwerde û Fêrkirinê ya Minbicê Sûhêl Walî jî got ev gav ne tenê li ser hin herêman e, ew dibistanên bajêr û gundewaran e û wiha got: "Plan li ser dibistanên bajarê Minbicê û gundewarên wê yên ku rastî zextan tên, em jî bi rola xwe radibin ku dibistanan ava dikin û yên heyî sererast dikin."

(jo)

ANHA


Mijarên Din