Komîteya Aboriya Jinan projeyên aborî pêk tîne

Komîteya Aboriya Jinan dikanek bi navê Star ji bo frotina kel û pelên malan li Qamişloyê vekir. Komîte hewl dide piştgiriya aboriya jinan û dabînkirina pêdiviyên malan bi buhayên guncaw pêk bîne.

Dikana Star îro li taxa Xerbî ya bajarê Qamişlo bi beşdariya gelek endamên saziyên civaka sivîl û saziyên jinan hat vekirin.

Di dikanê de tevahiya pêdiviyên malan ji mase, amûrên xwaringehê û hwd tên frotin.

Têkildarî armanca projeyê, endama rêveber a Komîteya Aboriya Jinan a Qamişloyê Iqlîme Mihemed diyar kir ku ew dixwazin di vê qeyrana aborî de alîkariya şêniyan bikin û kel û pelan bi buhayên guncaw bifiroşin.

Iqlîme Mihemed destnîşan kir ku dikan di mehekê de hate amadekirin û rojane saet ji 8`ê sibehê heta 2`yan piştî nîvro vekirî ye.

Komîteya Aboriya Jinan a Bakur û Rojhilatê Sûriyê armanc dike piştgiriya jinan bike, aboriya herêmê ya xweser geş bike, tevî peydakirina pêdiviyên pêwîst ji şêniyan re bi buhayên guncaw.

(şx)

ANHA


Mijarên Din