Li Kobanê di 20′ê Gulanê de Sempoyuzma 4′emîn a Rojava ya Hunera Şêwekariyê bi beşdariya şêwekarên ji hemû herêmên Bakur û Rojhilatê Sûriyeyê dest pê kiribû.
Dê sempozyum heta 26′ê Gulanê dewam bike û dûre pêşangeha şêwekariyê li Qamişloyê di 28′ê Gulanê de dest pê bike.
Di sempozyumê de tabloyên jinan ên herî balkêş bûn.
Şêwekar Emel Etar ku ji Reqayê ye û cara yekemîn e beşdarî sempozyumê dibe, ji ANHA’yê re axivî.
Emel Etar îşaret bi tabloyên li ser jinan ên têkildarî çandên herêmê kir û diyar kir ku jin bi rêya hunerî jî berxwedanê didomînin û got: "Îro rewş cuda ye, jin li qadên hunerê û hwd in. Ruxmî rewşên zehmet ên salên borî jinan huner jî li cih nehişt. Huner peyama aştiyê ye."
Emel wiha domand: "Heta jinên şêwekar xwe bi pêş bixin, divê van kevneşopên civakê bişikînin û peyamekê bidin ku jin dikarin di tevahî aliyan de bixebitin û hêza wan heye."
Şêwekar Hêva Îsmaîl jî ku ji Kobanê ye, got ji bo şikandona bendên li dijî jinan, wê biryar da ku beşdarî vê xebatê bibe û tabloyên li ser jinan û têkiliyên wan ên bi xwezayê re xêz bike.
Hêva wiha domand: "Bê guman hin mijar hene, jin nikarin wan eşkere bikin. Ew jî ji ber kevneşopên civakê ye. Ji lew re xêzkarî li kêleka hunerên din rêbaza baş a derbirîna hestên jinan e."
Hêva Îsmaîl bang li tevahî jinan kir ku rola xwe di tevahî aliyan de bilîzin û radestî zîhniyeta baviksalar nebin. Her wiha bang li jinan kir ku behreyên xwe di huner, rêveberî û aliyên din de bi pêş bixin.
(fr)
ANHA
