Hûsî: Me bi hezaran leşkerên Siûdiyê dîl girtine

Hûsiyên Yemenê ragihand ku di dema êrîşeke berfireh de wan bi hezaran leşkerên Erebistana Siûdî dîl girtine û her wiha dest danîne ser gelek wesayitên zirxî Koalîsyona Erebî.

Berdevkekî leşkerî yê Hûsiyan ji televîzyona E-Mesîra re axivî û got Erebistana Siûdî li herêma sînor a nêzî wîlayeta Necranê dest bi êrîşeke berfireh kiriye.

Li gorî berdevk Yahya Sarea, di operasyona bi piştevaniya droneyan û bataryayên parastina hewayî de, 'bi giştî 3 tûgayên dijmin' hatin têkbirin.

Yahya Sarea anî ziman ku bi hezaran leşkerên Koalîsyona Erebî hatine girtin û di nava wan de gelek efser û leşkerên Siûdiyê hene. Berdevk her wiha anî ziman ku wan dest daniye ser bi sedan wesayitên zirxî. Berdevk wiha got: "Operasyonê 72 saetan dom kir. Hêzên me li wîlayeta Necranê qadeke ji sedan kîlometreyî kontrol kir."

Sareya destnîşan kir ku wê bi dîmenan detayên operasyona li herêma Necranê ragihînin.


Mijarên Din