Helbestvana Kurd:Tenê dixwazim alîkariya koçberên ji Serêkaniyê bikim

Helbestvana Kurd Hena Dawûd di şahiya îmzekirina pirtûka xwe de got, ew ê pereyên firotina pirtûka xwe bide koçberên ji Serêkaniyê.

Vê êvarê Yekîtiya Rewşenbîrên Rojavayê Kuristanê şahiya îmzekirina pirtûka helbestvana Kurd Hena Dawûd a bi sernavê"40 binketin û ez", li navenda yekîtiyê ya li taxa Siyahî ya li bajarê Qamişlo li dar xist.

Hejmarek ji helbestvanan, rewşenbîran, nivîskarên Kurd, nûnerên partiyên siyasî û rêxistinên jinan beşdarî şahiyê bûn.

Di şahiyê de helbestvan Hena Dawûd çend helbestên di pirtûka xwe ya bi navê"40 binketin û ez"xwendin.

Hena 1000 kopyên pirtûkê çapkirin û di şahiyê de got, ew ê pereyên firotina van pirtûkan bide koçberên ji Serêkaniyê yên ku ji ber êrişên artêşa Tirk ji malên xwe derketine.

Her wiha got, projeya min û hatina min tenê ji bo ez bikaribim alîkariya koçberên ji Serêkaniyê bikim heta ku bi tiştekî hindik be jî. Şahî bi îmzekirina pirtûka helbestvana Kurd bi dawî bû.

(eh)

ANHA


Mijarên Din