Encamnameya civîna Meclisa Leşkerî ya QSD`ê

QSD’ê civîna xwe ya asayî duh li dar xist. Piraniya endamên meclisê beşdarî civînê bûn. Di civînê de bi giştî rewşa heyî û êrişên dewleta Tirk hatin nîqaşkirin, her wiha proje û plansaziya pêşerojê hate danîn.

Meclisa Leşkerî ya Hêzên Sûriya Demokratîk civîna xwe ya asayî duh (15 Çile) li dar xist. Di civînê de berdewamkirina pêkanîna bernamayê û vesazkirina hêzên leşkerî ji aliyê rêxistinî ve hat nîqaşkirin, her wiha rola meclisên leşkerî yên herêmî û asta erênî ku gihîştiyê, hat nirxandin. Di civînê de bal kişandin ser girîngiya pêşxistina hêzên leşkerî di aliyê hejmar û perwerdekirinê de bi rêya zêdekirina hejmar, çek û cebilxaneyê. Her wiha bi rêya dewreyên perwerdeyê yên taybet di hemû aliyan de da ku hêz di hemû aliyan de amade bin û li gorî pêvajoyê bin.

Hate piştrastkirin ku divê çareseriya siyasî bi rêya dan û standinên bi hemû aliyên peywendîdar re di çarçoveya itîrafkirina bi Rêveberiya Xweser a Bakur û Rojhilatê û parastina statuya QSD`ê di nava sîstema parastin û ewlehiya Sûriyê ya pêşerojê de, divê pêk were.

DEWLETA TIRK HEYPEYMANAN BINPÊ DIKE

Di heman demê de, di civînê de hevpeymana Soçiyê ya ku bi garantiya Rûsyaya Federal di 22`yê Cotmehê de pêk hatiye, hate nîqaşkirin û teqezî li ser pêkanîna bendên hevpeymanê li ser erdê hate kirin. Lê ji aliyekî din ve jî, dewleta Tirk li gorî hevpeymanê tev negeriya û heta niha bi zanebûn bendên hevpeymanê binpê dike û ev yek jî ewlehiya herêmê bi tevahî dixe nava metirsiyê. Herî dawî jî, bi balafireke bêpîlot (drone) di 12`ê Çileyê de êrişî herêma Tirbespiyê kir û di encamê de 2 endamên Hêzên Ewlekariya Hundirîn şehîd bûn û hinên din jî birîndar bûn.

Di civînê de, hevpeymana agirbestê ya ku di 17`ê Cotmehê de, di navbera Tirkiye û DYA`yê de çêbû, hate nîqaşkirin. Hate piştrastkirin ku tevî hêzên wan li gorî bendên hevpeymanê tev geriyane, lê Tirkiyê bendên hevpeymanê binpê kirin û heta niha dewleta Tirk siyaseta guhartina demografî û qirkirina etnîk pêk tîne, her wiha rojane sûcan li dijî sivîlên ku li herêmên dagirkirî mane, pêk tîne. Di heman demê de, dest datîne ser milkên sivîlan û kesên biyanî li malên sivîlan bi awayekî zanebûn bi cih dike. Her wiha destûr nade ku koçber vegerin cihê xwe yê resen û bi rêya komên çekdar ên girêdayî xwe, li dijî sivîlan siyaseta tirsê bi kar tîne. Di civînê de, ji aliyên garantor hate xwestin ku Tirkiye Ii gorî hevpeymanê tev bigerin û berpirsyariya qanûnî ku dikeve ser milên wan, pêk bînin û sînorekî ji ji van sûcên dermirovî re deynin.

REWŞA IDLIB Û EFRÎNÊ

Di civînê de, bal kişandin ser rewşa mirovahî û tirsnak a li bajarên Idlib û Efrînê û hate piştrastkirin ku tiştên ku li her du bajaran dibe, encama siyaseta dewleta Tirk û destwerdana wê di kar û barên gelê Sûriyê de ye û bazirganiya bi xwîna wan e. Her wiha li ser biryara Fermandariya Giştî ya QSD`ê ya hembêzkirina koçberên ji Idlibê û peydakirina pêdiviyên wan ên mirovî bi rêya peywendiya wan bi komên girêdayî Hêzên Sûriya Demokratîk ên li herêman re, hate teqezkirin.

Di dewama civînê de, operasyonên koordînekirî bi hêzên Koalîsyona Navneteweyî ya li dijî DAIŞ`ê û pêdiviya dewamkirina keda ku hatiye dayîn ji bo têkbirina rêxistina terorîst û da ku careke din venegere, hate nîqaşkirin.

Her wiha di civînê de, xebatên koordîne bi hêzên artêşa Rûsyayê li Sûriyê û belavbûna wê li gorî hevpeymana Soçiyê da ku ewlehî û îstiqrarê li herêmê çêbe û teqezî li ser dewamkirina vê koordîne û hevkariyê hate kirin.

Di dawiyê de, li ser hêza QSD`ê ya rakirina berpirsyariya dîrokî û pêkanîna erka xwe ya parastina hemû berjewendiyên herêmê û pêkanîna edaletê, hate piştrastkirin.

 


Mijarên Din