‘Divê Rêveberiya Xweser di çareserkirina aloziya Sûriyê de neyê paşguhkirin’

Eksem Neîsa destnîşan kir ku sozên Ewropayê ji bo Rêveberiya Xweser têkildarî beşdarkirina rêveberiyê di prosesa siyasî ya Sûriyê de mijareke xwezayî ye, nabe were paşguhkirin.

Di hefteyên dawîn de serdanên şandeyên dîplomatîk, siyasî û leşkerî yên rojavayî ji bo Bakur û Rojhilatê Sûriyê zêde bûn. Girêdayî sedema van serdanan, muxalifê Sûriyê û gerînendeyê Navenda Şam a Lêkolînên Demokratîk û Mafên Mirovan Eksem Neîsa ji ANHA‘yê re axivî.

Neîsa di destpêka axaftina xwe de got: "Gelek sedemên van serdanan hene, piraniya wan girêdayî xwezaya pêvajoyê ne ku Rêveberiya Xweser xwedî rewşeke girîng di siyaseta Sûriyê de ye.”

Neîsa li ser encamên serdanan got: "Sozên Amerîka û Koalîsyona Navdewletî pêşkêş dike, kêm in û nagihîje asta girîngiya Rêveberiya Xweser. Mînak; sozên beşdarkirina Kurdan di diyalogên bê de li gorî rola Rêveberiyê Xweser, ev tiştekî kêm e ji ber ku beşdarkirina Kurdan şertekî xwezayî ye û nabe rola Kurdan di çareserkirina aloziya Sûriyê de were paşguhkirin."

Di hefteya derbasbûyî de şandeya dîplomatên rojavayî; DYA, Belçîka, Fransa, Parlamantoya Ewropayê, Erebistana Siûdî, Kazaxistan û Ozbekistan û şandeya akademîsyen û rewşenbîrên Ereb û biyanî serdana Rêveberiya Xweser a Bakur û Rojhilatê Sûriyê kir û piştgiya xwe bi rêveberiya re ragihand û girîngiya beşdarkirina rêveberiyê di çareserkirina aloziya Sûriyê de parve kir.

Eksem Nesîa di nava gotinên xwe de destnîşan kir ku sozên hatin dayîn kêm in, lê nîşaneyeke girîng e ku zemîneke siyasî hebe ku ji dewletên mezin bi taybet ên Ewropî ku Rêveberiya Xweser were qebûlkirin û wiha domand: "Bi teqez ev zemîn ne Ewropa û ne jî rojava wekî sifreyeke ji zêr pêşkêş dike, lê şertên xwe jî li hember vê yekê hene. Ez texmîn dikim ku ev erka berpirsyariya Rêveberiya Xweser e ku rewşê qezenc bike û gavên pêş de biavêje da ku karibe bandorê li prosesa siyasî bike."

Neîsa bang li Rêveberiya Xweser a Bakur û Rojhilatê Sûriyê kir ku sazûmaniya saziyên xwe li gorî pêvajoya bê nû bike û ev tişt anî ziman: "Ez texmîn dikim ku Rêveberiya Xweser di vê astê de be divê sîwana wê ya siyasî MSD sazûmaniyê li gorî pêwîstî û hesasiyetên pêvajoyê ava bike. Di vir de jî wekî me bi bîr xist; pişta xwe bide kadroyên siyasî yên dînamîk û pispor.”

Eksem Neîsa di dawiya axaftina xwe de îşaret bi kaxezên bihêz ên li gel Rêberiya Xweser kir ku karibe di diyalogan de fişarê bike û got: "Li gel Rêveberiya Xweser kaxezên girîng hene ku dikare di hemû aliyan de bi kar bîne, herî zêde li ser maseya muzakereyan û beriya destpêkirina muzakereyan, mîna ku niha tê kirin."

(bb)

ANHA


Mijarên Din