`Dem dema parastina destkeftiyên Bakur û Rojhilatê Sûriyê ye`

Bi sedan şêniyên navçeya Dirbêsiyê û Til Temir di roja sêyemîn a konê mertalên zindî yê li ser sînor dewr girtin. Kongreya Star  bang li hemû têkoşerên azadî, aştî û demokrasiyê kir, da ku qirkirinên komî ku dagirkeriya Tirkiyê dixwaze pêk bîne, bidin rawestandin.

 Piştî  ku dewleta dagirker leşkerên xwe li ser sinor kom kirin, bi sedan şêniyên herêma Serêkaniyê di 8`ê Tîrmehê de li ser  sînorê di navbera Bakurê Sûriyê û Bakurê Kurdistanê de dest bi çalakiya mertalên zindî kirin. 

Piştî 3 rojan ji destpêkirina çalakiyan, îro bi sedan şêniyên navçeya Dirbêsiyê û Til Temirê çalaki dewr girtin.

Dema ku şêniyên Dirbêsiyê û Til Temirê gihaştin cihê çalakiyê, Kongreya Star daxuyaniyek da. Daxuyanî ji aliyê endama Koordînasyona Kongreya Star a kantona Hesekê Evîn Paşo ve hate xwendin.

Kongreya Star  di daxuyaniyê de wiha got:

"Dewleta Tirk bi hemû awayî şoreşa Rojava kir hedefa xwe, di nav de çeteyên DAIŞ`ê şandin herêmên me û hemû cûreyên şidetê pêk anîn. Berxwedana ku li Kobanê dest pê kir û çeteyên DAIŞ`ê têk bir, li hemû Bakurê Sûriyê belav bû. Hêzên  ku li Kobanê şer kirin, parçeyên mezin ji Sûriyê rizgar kirin.

Niha dikeve ser milê me ku em parastina van destkeftî û xaka ku hêzên me rizgar kirin ,bikin. Ji ber vê yekê em bang li hemû têkoşeran dikin ku ji bo azadî, aştî û demokrasiyê û yekbûna gelan dikin ku qirkirin û êrîşên Osmaniya nû bidin rawestandin.

Ev gef li ser hemû jinên cîhanê ye, tiştê ku dewleta Tirkiyê niha dike ji bo vejandina çeteyên DAIŞ`ê ye. Ji ber vê yekê bi navê jinên Bakur û Rojhilatê Sûriyê em bang li dewleta Tirkiyê dikin ku, siyasetên xwe hember gelên Bakur û Rojhilatê Sûriyê terk bike û xwîna gelên herêmê nerjîne.

Li ser vê bingehê em wek Kongreya Star piştgiriya xwe bi gelê xwe li Serêkaniyê re û beşdarbûna xwe li konê mertalên zindî radigihînin, niha dem dema parastina destekftiyên gelên Bakur û Rojhilatê Sûriyê ye."

Tê payîn ku piştî şêniyên Til Temirê û Dirbêsiyê, şêniyên Hesekê çalakiyê dewr bigirin.

ANHA


Mijarên Din