​​​​​​​Darizandina doza qetilkirina Herîrî hate taloqkirin

Dadgeha navneteweyî ya taybet bi Lubnanê çarşemê darizandina doza qetilkirina serokwezîrê berê Refîq Herîrî, taloq kir.

Dihat payîn ku doza qetilkirina Herîrî Îna bê bihata darizandin, lê  belê dadgehê darizandina dozê heta 18`ê Tebaxê taloq kir.

Biryara taloqkirinê piştî teqîna li perava paytexta Lubnanê Beyrûtê ku tê de 135 kes mirin û nêzî 4 hezar kes birîndar bûn, hate dayîn.

Doz girêdayî 4 mêran e ku bi teqîna sala 2005`an ku tê de Refîq Herîrî û 21 kesên din hatin hedefgirtin, tên tewanbarkirin.

Neteweyên Yekbûyî û Lubnanê dadgeha taybet a Lubnanê ji bo darizandina doza teqînê û bûyerên din ên qetilkirina siyasetmedaran ku di heman demê de pêk hatibûn, ava kir. Ji dema avakirina vê dadgehê ve di 2007`an de heta niha, ev yekemîn doz e ku dê bê darizandin.

(cx)

ANHA


Mijarên Din