Cenazeyên şehîd Zinar û Ehmed li Hesekê hatin veşartin

Bi hezaran şêniyên bajarê Hesekê û gundên wê cenazeyê şehîdên Berxwedana Rûmetê Ehmed Medad û Zinar Raperîn bi merasîmekê spartin axê.

Girse cenazeyên şervanê Hêzên Xweparastinê Ehmed Medad û şervanê QSD‘ê Ehmed Ebdulcelîl (Zinar Raperîn)ên ku di çarçoveya Berxwedana Rûmetê ya bersivdayîna êrişên artêşa Tirk  û çeteyên wê de şehîd bûn ji ber avahiya Meclisa Malbatên Şehîdan a bajêr wergirtin û bi kerwanekî ber bi Goristana Şehîd Dijwar a li gundê Dawudiyê ve ketin rê.

Kerwanê cenaze li goristanê ji aliyê sedan kesî ve hate pêşwazîkirin.

Merasîm bi deqeya rêzgirtin û turana leşkerî destpê kir. Endama Meclisa Malbatên Şehîdan Ezîza Hisên axivî. Ezîza sersaxî ji malbatên şehîdan re xwest û got: "Em ji mirinê natirsin, ji destpêkê ve em ji bo azadî û rûmetê têdikoşin, em ê têkoşîna xwe berdewam bikin heta armancên şehîdan pêk bînin."

Bi navê hêzên leşkerî li bajarê Hesekê Salim Îbrahîm axivî û ev tişt anî ziman: "Hêzên me di parastina gelê xwe de berdewam in, roj bi roj îrade û israra me zêde dibe. Em xeta berxwedanê berdewam bikin heta hemû herêman ji dagirkeriya Tirk û çeteyên wê rizgar bikin. Em soz didin şehîdên xwe ku em ê xeta wan bişopînin."

Piştre nasnameyên şehîdan ji aliyê endama Meclisa Malbatên Şehîdan Rojda Ehmed ve hate xwendin û radestî malbatên wan hatin kirin.

Meclisa Malbatên Şehîdan nasnameyên 6 şehîdên Berxwedana Rûmetê eşkere kirin, şervana YPJ‘ê Nesrîn Yûsif (Bêrîtan Serêkaniyê) şervanê Hêzên Erka Xweparastinê Mehmûd Wegai (Mehmûd Hesekê), Îbrahîm Elî Hesen (Kamûran Cûdî), Mehmûd Şerîf El-Abdullah (Nîdal Hesekê) û Mehmûd Şemît (Kesar Hesekê).

Cenazeyên herdu şehdan di nava dirûşe û tilîliyên dayikan hatin veşartin.

ANHA


Mijarên Din