Çalakiyên mertalên zindî li Kobanê di roja 21’an de didomin

Bi sedan çalakvanên mertalên zindî li ser sînorê Tirkiyê çalakiya xwe didomînin. Çalakvanan di roja 21’an a çalakiyê de gefên dewleta Tirk ên li dijî herêmên Bakur û Rojhilatê Sûriyê red kirin.

Ji 17`ê Tîrmehê ve bi sedan şêniyên kantona Kobanê dest bi çalakiya mertalên zindî li ser sînorê Tirkiyê li gundên Qeremox û Ziyaretê kir. Ev yek piştî ku Tirkiyê hêzên xwe yên leşkerî li ser sînor zêde kirin û gef li dijî herêmên Bakur û Rojhilatê Sûriyê xwarin, pêk hat.

Çalakiya şêniyan li konê gundê Qeremox ê li rojhilatê bajarê Kobanê, derbasî roja xwe ya 21`an bû. Îro şênî, hefteya sêyemîn a xwepêşandana li ser sînorê Tirkyê ya li nêzî gundê Qeremox bi dawî dikin.

Rojane endam û rêveberên partiyên siyasî yên kantonê û rêveberên saziyên civaka sivîl û Rêveberiya Xweser a kantonê beşdarî çalakiyê dibin.

Li gelek bajar û bajarokên Bakur û Rojhilatê Sûriyê çalakiyên redkirina gefên Tirkiyê û çalakiyên mertalên zindî li ser sînorê Tirkiyê dewam dikin.

(jo)

ANHA


Mijarên Din