Çalakiyên gel ên li dijî sûcên dewleta Tirk didomin

Şêniyên kantona Qamişloyê sûcên dewleta Tirk û destwerdana di kar û barên gelek dewletan de şermezar kirin û berxwedana 14`ê Tîrmehê bi bîr anîn. Gelê Qamişloyê bang li civaka navdewletî kir ku sûcên Tirkiyê bisekinînin.

QAMIŞLO

Şêniyên bajarê Qamişlo bi meşekê sûcên dewleta Tirk şermezar kirin û ji Çerxerêya Qermûtî ya rojavayê bajarê Qamişo ber bi Navenda Mihemed Şêxo ya Çand û Hunerê ve çûn.

Xwepêşandêran sloganên "Bijî berxwedana gelan”, “Bijî berxwedana 14 Tîrmehê”, “Azadî ji rêber Abdullah Ocalan re" berz kirin û pankartên "Bi rihê berxwedana 14`ê Tîrmehê em ê xiyanetê û dagirkeriyê hilweşînin, bi yekitiya xwe em ê komployên li dijî gelan têk bibin" û alên kurdî û wêneyên şehîdan rakirin.

Endama Meclisa Malbatên Şehîdan Şemsîxan Gulo di çalakiyê de axivî û da zanîn ku berxwedan û têkoşîna şehîd Alî Çîçek, Xeyrî Durmuş, Akîf Yelmaz û Kemal Pîr hîn jî berdewam e. Şemsîxan Gulo got: "Fikrên demokratîk êm rêber Abdullah Ocalan kilîta garantiya ewlehiya Kurdistanê û dewletên Rojhilata Navîn e."

Çalakî bi sloganên"Bijî berxwedan”, “Azadî ji rêber Ocalan re" bi dawî bû.

TIRBESPIYÊ

Meclisa navçeya Tirbespiyê ji bo şermezarkirina êrişên artêşa Tirk a dagirker ên li dijî Başûrê Kurdistanê û Bakur û Rojhilatê Sûriyê, meşek organîze kir. Şêniyan di meşê de bang li civaka navdewletî kir ku rê li pêşiya sûcên dewleta Tirk ên li dijî sivîlan û mudaxeleyên wê di kar û barên dewletên cîran de rawestînin.

Şênî li ber avahiya Kongreya Star li rojhilatê navçeyê kom bûn. Her wiha pankartên bi nivîsên `Bi ruhê berxwedana 14`ê Tîrmehê em ê xiyanet û dagirkeriyê têk bibin` hildan. Şênî di sûka navendî re meşiyan û sloganên li dijî dagirkeriyê berz kirin. Piştre li ber navenda Yekitiya Ciwanên Rojava rawestîn.

Piştî deqeya rêzgirtin hevserokê Meclisa navçeya Tirbespiyê Ebdulrehîm Hiso û bi navê partiyên Meclisa Sûriya Demokratîk endamê rêvebe ê meclisê Ebas Hisên axivîn.

Axaftvanan destnîşan kir ku dewleta Tirk ji gelek serdeman ve lihevkirinên navdewletî binpê dike û êrişî dewletên cîran dike di hewldanekê de ji bo ku vîna gelan li gel bêdengiya navdewletî bişkîne.

Axaftvanan bang li civaka navdewletî kir ku rê li pêşiya sûcên dewleta Tirk a dagirker bigirin. Her wiha bang li gel kir ku asta têkoşînê li hemberî dewleta Tirk a dagirker a ku hewl dide azadiya gelan têk bibe, mezin bikin.

TIL HEMÎS

Bi sedan şêniyên navçeya Til Hemîsê îro piştgiriya xwe bi gelên azadîxwaz û demokratîk re bi rêya lidarxistina meşekê rave kir. Şêniyan êrişên artêşa Tirk a dagirker ên li dijî başûrê Kurdistanê û Lîbyayê şermezar kirin.

Meş ji ber avahiya meclisa navçeyê dest pê kir. Tê de şêniyan alên Hêzên Sûriya Demokratîk, wêneyên rêber Abdullah Ocalan û pankartên “Bi yekitiya xwe em ê komployên li dijî gelan têk bibin”, “Na ji dagirkeriya Osmanî ya nû re ya li dijî bakurê Iraqê, Lîbya û Sûriyeyê” hildan.

Meş li ber Çerxerêya Şehîdan rawestî. Piştre hevserokê meclisa navçeya Til Hemîsê Hiyal El-Xiwêr axivî û got: “Dewleta Tirk hincetan derdixe ji bo ku êrişî gelan û dewletan bike û dev ji sûcên xwe bernade. Gelo dewleta Tirk ji cîhanê çi dixwaze? Ji projeyên xwe yên dagirkirinê çi armanc dike? Gelo dixwaze careke din dewleta Osmanî vejîne? Erê rast e ew dixwaze dewleta Osmanî bi rêya milîsên çekdar û çeteyên ku şandine Lîbyayê û dewletên din, vegerîne.”

El-Xiwêr soza berdewamkirina têkoşînê û parastina mirovahiyê da.

Coza El-Hasûd endama rêveber a Kongreya Star a Til Hemîsê jî axivî û jinên şehîd ên ku ji bo ku jin bi azadî û bi rûmet bijîn canê xwe feda kirine, bi bîr anîn û sûcên dewleta Tirk ên li dijî herêmê şermezar kirin.

)şx-eh)

ANHA


Mijarên Din